شماری از تاجران افغان در شمال افغانستان خواستار از سرگیری فعالیت قنسولگری تاجیکستان در ولایت کندز شده اند.
این قنسولگری چهار سال پیش به دلیل تهدیدهای امنیتی مسدود شد.
شماری از تاجران در ولایت کندز با طرح مشکلات دریافت ویزه تاجیکستان، تقاضای فعالیت مجدد قنسولگری تاجیکستان در این ولایت را مطرح کردند.
ضیاءالحق ضیائی، یکی از این تاجران کندزی به نمایندگی از دیگر تاجران گفت: "اول این که ویزه از ۸۰۰ تا ۹۰۰ دالر است. یک تاجر کندزی می‌رود تا بدخشان در همین راه پُرخطر، که هر روز در پیش روی‌شان طالبان مسلح سنگر می‌گیرند، با مشکل روبه‌رو هستند."
آقای ضیایی افزود: "ما جداً از مقام‌های امنیتی و محلی کندز تقاضا داریم که دوباره درِ قنسولگری تاجیکستان را به روی مردم باز کنند."
آنان می‌گویند این مشکلات را با والی کندز و سران حکومت وحدت ملی در میان گذاشته‌اند، اما هنوز به درخواست آنها رسیدگی نشده است.
از سویی هم مسئولان اتاق تجارت و سرمایه‌گذاری کندز می‌گویند که عدم فعالیت قنسولگری تاجیکستان چالش‌های زیادی در برابر تاجران افغان به وجود آورده است.
مسعود وحدت سخنگوی این اتاق گفت: "قنسولگری تاجیکستان در کندز وجود ندارد. تاجران برای اخذ ویزه به بدخشان یا کابل می‌روند و با پرداخت پول گزاف و سپری کردن مشکلات ویزه می‌گیرند. توقع داریم دولت به این مشکل تاجران رسیدگی کند."
با این حال عصمت‌الله مرادی، سخنگوی والی کندز می‌گوید که رهبری ولایت با قنسولگری تاجیکستان در مزارشریف در این خصوص صحبت کرده، قنسولگری تاجیکستان به زودی فعالیت خود را در کندز آغاز می‌کند.
او افزود: "به اداره‌های مربوط به ویژه به سکتور امنیتی دستور داده شده تا در خصوص تأمین امنیت قنسولگری تاجیکستان اطمینان بدهند تا این قنسولگری دوباره فعالیت خود را در کندز آغاز کند."
به گفته تاجران افغان در کندز، از چهار سال به این‌سو تاجیکستان به دلیل افزایش ناامنی قنسولگری خود را در این ولایت بسته است که تاجران افغان و ساکنان ولایت‌های شمال‌شرقی را با مشکل مواجه کرده است.
