نظامیان تاجیکستان، رزمایش نظامی گسترده‌ای را در مناطق مرزی میان بدخشان افغانستان و بدخشان مختار تاجیکستان به هدف ممانعت از ورود تروریستان و قاچاق‌بران مواد مخدر به خاک آن کشور راه‌اندازی کرده است تا از این طریق بتواند از وردود تروریستان به خاک تاجیکستان جلوگیری کند.
در پی افزایش ناامنی‌ها در مناطق مرزی بدخشان افغانستان و حضور تروریستان تاجیکستانی در ولسوالی نسی این ولایت، حکومت تاجیکستان به تاریخ ۲۱ جولای سال جاری فیصله کرد تا با اجرای رزمایش نظامی در مناطق مرزی بدخشان افغانستان و تاجیکستان توانایی نظامی این کشور را به نمایش بگذارد و نیروهای امنیتی و مردم را در جهت مبارزه با تروریستان و جلوگیری از نفوذ آنها به خاک تاجیکستان بسیج نماید.
به گزارش خبرگزاری خاورمیانه، تلویزیون دولتی تاجیکستان در گزارشی آورده است که این مانور دو روز قبل (۱۳ اسد) سال جاری آغاز شده و امروز (چهارشنبه، ١٥ اسد) پایان یافت.
وزارت دفاع تاجیکستان گفته است که این رزمایش به هدف صیقل دادن هماهنگی و تجربۀ هئیت شخصی ساختارهای نظامی در اجرای عملیات مؤفقانۀ جنگی، توسعه نیرو و سایط نظامی در مناطق مرزی، افزایش آمادگی روحی و روانی، قابلیت جنگی و جسمانی، و به نمایش گذاشتن توانایی نیروهای نظامی در مبارزه با تروریسم در مناطق مرزی و حفاظت از سرحدات این کشور راه‌اندازی شده است.
حمله به تروریست‌ها و نابودی آنها، استراتیژی محاصره و از بین بردن نفوذ تروریزم بین‌المللی در قلمرو تاجیکستان، از اهداف عمده این رزمایش نظامی گسترده نظامی گفته شده است.
در این رزمایش نظامی، بیش از ۳۰۰ واسطه نقلیه زرهی، طیاره و تجهیزات نظامی چون توپ‌های مختلف‌النوع مورد استفاده قرار گرفته است که اوج قدرت نظامی این کشور را به نمایش گذاشته است.
در گزارش تلویزیون دولتی تاجیکستان آمده است که این رزمایش از سوی شیرعلی وزیر دفاع تاجیکستان و فرماندهان کل ارتش این کشور مدیریت و رهبر می‌شود و بیش از ده هزار نفر هیئت شخصی ساختارهای قدرتی و مقام‌های حکومتی، گارنیزیون شهر خاروغ و شهروندان که در احتیاط قرار داشته اند در این رزمایش شرکت کرده اند.
این رزمایش نظامی در حالی راه‌اندازی می‌شود مقام‌های حکومت محلی بدخشان از افزایش فعالیت گروه‌های تروریستی به ویژه گروه انصارالله تاجیکستان در این ولایت اظهار نگرانی کرده بوند.
مقام‌های حکومت تاجیکستان گفته اند که در پی افزایش ناامنی‌ها در مناطق مرزی بدخشان افغانستان به ویژه ولسوالی نسی این ولایت که در همسایگی تاجیکستان قرار دارد، نزدیک به ۴۰ تن از افراد متعلق به گروه‌های تروریستی تاجیکستانی در این ولسوالی جا گرفته اند.
به گفتۀ مقام‌های حکومت تاجیکستان، این کشور از تمام توان برای جلوگیری از نفوذ تروریستان به خاک این کشور استفاده می‌کند و با اجرای این رزمایش از یک‌طرف نهادهای امنیتی را در امر مبارزه با تروریسم بسیج می‌نماید واز سوی دیگر با به نمایش گذاشتن توانایی‌های نظامی این کشور به تروریستان که قصد ورود به خاک تاجیکستان را داشته باشند هشدار دهی می‌کنند.
مقام‌های محلی بدخشان گفته اند که افزایش فعالیت تروریستان خارجی در این اواخر در این ولایت زیاد شده است و افراد مربوط به گروه‌های ترویستی انصارالله تاجیکستان، جنبش اسلامی ترکستان شرقی و القاعده و داعش فعالیت‌های شان را نسبت به گذشته توسعه داده اند.
تاجیکستان مرز طولانی نزدیک به ١٤۰۰ کیلومتر با بدخشان افغانستان دارد و افزایش فعالیت گروه‌های تروریستی در این ولایت به ویژه در مناطق مرزی از چند سال به این‌سو مایۀ نگرانی حکومت تاجیکستان شده است و این کشور در تلاش است راهکارهایی را به هدف جلوگیری از نفوذ تروریستان که بخش بزرگ آنان را اتباع تاجیکستان تشکیل می‌دهند جلوگیری کنند.
