ساکنان درواز بدخشان به امام علی رحمان: کمک‌مان کن

رئیس جمهوری تاجیکستان و باشندگان ولسوالی شکی بدخشان افغانستان از طریق بلندگو در دو طرف رود آمو با رئیس جمهور تاجیکستان صحبت کردند.

روز گذشته شماری از باشندگان ولسوالی شکی بدخشان افغانستان؛ هنگامی که امام علی رحمان رئیس جمهور تاجیکستان از مرز دریای آمو در خاک کشورش عبور می‌کرد، در امتداد دریا آمو در خاک افغانستان صف کشیدند و با استقبال گرم از رئیس جمهور تاجیکستان خواهان تطبیق پروژ‌ه‌های توسعه‌یی در ولسوالی مرزی بدخشان افغانستان شدند.

یک نوار تصویری که در رسانه‌های اجتماعی دست‌به‌دست می‌شود، نشان می‌دهد که رئیس جمهوری تاجیکستان با باشنده‌گان مناطق مرزی بدخشان افغانستان از طریق بلند‌گو در حدود نیم ساعت صحبت کرده است.

دیده می‌شود که مردم محل از امام علی رحمان می‌خواهند که آب آشامیدنی صحی، جاده؛ برق و "پل دوستی" برای‌شان بسازد.

باشندگان بدخشان افغانستان می‌گوید: "ما تشریف‌آوری شما را در دروازهای تاجیکستان خیر مقدم می‌گویم و امیدوار هستیم، همان طوری که به خدمت تان به باشندگان مرزی تاجیکستان رسیده است، ان‌شاالله دست رحمت بر ما هم دراز نماید، قسمی‌که شما در جریان هستید، مردم ما نیازمند به آب صحی، برق، شبکه‌های مخابراتی، سرک و پل دوستی می‌باشد."

از سویی هم در این نوار تصویری دیده می‌شود که امام علی رحمان رئیس جمهور تاجیکستان به باشنده‌گان مناطق مرزی بدخشان افغانستان می‌گوید که هرگاه آنان مشکلات‌شان را از طریق حکومت افغانستان با حکومت تاجیکستان در میان بگذارند این حکومت از طریق کمک‌هایش به مشکلات مردم مناطق سرحدی بدخشان افغانستان رسیدگی خواهد کرد.

رئیس جمهور تاجیکستان گفت: "ما شما را دوست می‌داریم، همه کارهایی‌ که در این منطقه کردیم، برای شما هم است. خدمات در بخش آب صحی و بند برق که به مردم بدخشان تاجیکستان کردیم در آینده برای شما هم در نظر گرفته شده است. هر چی مشکلی‌ که شما دارید، از طریق مقام‌های محلی تان به ما پیشنهاد گردد، ان‌شاالله در آینده نزدیک ما به خدمت شما می‌رسیم."

در همین حال اختر محمد خیرزاده، معاون والی بدخشان می‌گوید که مردم مناطق مرزی بدخشان افغانستان بگونه خود جوش و بدون این که حکومت محلی را در جریان قرار دهند به استقبال رئیس جمهور تاجیکستان رفته و از وی کمک خواسته اند.

وی افزود: "باشندگان مناطق مرزی بدخشان بگونه خودجوش آمدن و از او استقبال کردند، ما از گذشته روابط خوب با کشور تاجیکستان داریم، ما مشکلات روستانشینان خود را درک می‌کنیم، ما ۵ پل ساختیم، بازار مشترک داریم، اداره محلی بدخشان آماده هر نوع همکاری است، ما تلاش می‌کنیم که سرک برای‌شان بسازیم و به مشکلات‌شان رسیدگی کنیم."

ولایت بدخشان افغانستان با کشور تاجیکستان بیشتر از ۸۰۰ کیلومتر مرز دارد و همواره باشندگان مناطق مرزی بدخشان افغانستان به دلیل دوری راه‌های مواصلاتی و جغرافیای دشوار گذر با مشکلات گسترده‌ای روبرو اند، از همین‌رو همه ساله

باشندگان مناطق مرزی بدخشان افغانستان بیشتر از مشکلات محلی‌شان را در بخش‌های صحت و انتقال مواد غذایی از طریق خاک تاجیکستان مرفوع می‌‌کنند.