لینک‌های قابل دسترسی

خبر تازه
دوشنبه ۲۴ جوزا ۱۴۰۰ کابل ۰۱:۵۸

نگرانی کشورهای آسیای مرکزی از خروج نیروهای بین‌المللی از افغانستان


نیروهای امریکایی در حال بیرون شدن از افغانستان

تمرینات نظامی نیروهای تاجیکی وروسی در ولایت ختلان تاجیکستان در مرز بدخشاناعلام خروج کامل نیروهای بین‌المللی از افغانستان تا ماه سپتمبر امسال ظاهراً برخی از کشورهای آسیای مرکزی را نگران کرده است.

آنان از این ترس دارند که مبادا جنگجویان افراطی از افغانستان به کشورهای آسیای مرکزی سرازیر شوند.

برخی از کشورهای آسیای مرکزی از جمله تاجیکستان همرز افغانستان پیشاپیش تدابیر امنیتی‌شان را افزایش داده اند.

وزارت دفاع تاجیکستان هفته گذشته اعلام کرده که هزاران سرباز آن کشور و روسیه تمرین نظامی سه روزه‌ای را در بخش‌های از ولایت ختلان همرز بدخشان اجرا کردند.

تمرینات نظامی نیروهای تاجیکی وروسی در ولایت ختلان تاجیکستان در مرز بدخشان
تمرینات نظامی نیروهای تاجیکی وروسی در ولایت ختلان تاجیکستان در مرز بدخشان

وزرات دفاع تاجیکستان در اعلامیه‌ای گفته که ۵۰ هزار سرباز در آن تمرینات نظامی اشتراک کردند.

خلوت شاه محمود آگاه امور نظامی در تاجیکستان است.

او به رادیو آزادی گفت که هدف از اقدام تازه پیشگیری از تهدیدهای احتمالی از خاک افغانستان است: "اگر مرزها حمایت می‌شود و یا هم امنیت مرزها سخت‌تر می‌شود، بلی هم کشور تاجیکستان وهم کشور روسیه و دیگر کشورهای منطقه که منفعت دارند، تلاش می‌کنند که به نیروهای اجنبی و تروریست اجازه مختل کردن وضعیت امنیتی را ندهند."

تمرینات نظامی نیروهای تاجیکی وروسی در ولایت ختلان تاجیکستان در مرز بدخشان
تمرینات نظامی نیروهای تاجیکی وروسی در ولایت ختلان تاجیکستان در مرز بدخشان

عبدالرحمن طلعت یک عضو شورای ولایتی بدخشان به رادیو آزادی می‌گوید که جنگجویان خارجی مستقر در بخش‌های بدخشان به ویژه آنانی که به شاخه انصار‌الله تاجیکستان وابسته اند، تلاش می‌کنند از مناطق مرزی بدخشان خود را به تاجیکستان برسانند.

او گفت: "تروریستانی که در بدخشان هستند، به خاطر دراین ولایت آمده اند که وضعیت کشورهای همسایه را خراب کنند، همین لحظه خود را به مرز رسانده اند."

اما مقام‌های محلی در بدخشان می‌گویند که به جنگجویان داخلی و خارجی اجازه نمی‌دهند که از خاک افغانستان کشورهای دیگر را تهدید کنند.

اخترمحمد خیر‌زاده معاون والی بدخشان می‌گوید: "برای تروریستان مرز وجود ندارد و هر جایی که خواسته باشند و تلاش می‌کنند که وضعیت را مختل کنند. ما همین قدر تلفات را متقبل می‌شویم، هدف ما این است که نباید تروریستان از خاک ما به کشورهای همسایه حمله کنند."

پیش ازاین محمد ذکریا سودا والی بدخشان به رادیو آزادی گفته بود که در کنار طالبان داخلی، بیشتر از ۸۵۰ جنگجوی خارجی از کشورهای مختلف مانند، انصارالله تاجیکستان، ایغورهای منطقه شنجن چین و نیز جنگجویان از ازبیکستان و پاکستان در بدخشان فعالیت می‌کنند. بدخشان با تاجیکستان، پاکستان و چین سرحد مشترک دارد.

اما ذبیح‌الله مجاهد یک سخنگوی گروه طالبان حضور جنگجویان خارجی دربدخشان را بارها رد کرده است.

نزدیک به سه ماه قبل احمد ضیاء سراج رئیس عمومی امنیت ملی کشور در جریان نشست مردمی در بدخشان اعلام کرد که شش ماه اول سال ۱۴۰۰ شاید خطرناکترین سال برای مردم این ولایت باشد.

تمرین نظامی مشترک بین تاجیکستان و روسیه در حالی صورت می‌گیرد که به تازگی، جوبایدن رئیس جمهور ایالات متحده اعلام کرده که سربازان امریکایی تا یازدهم ماه سپتمبر از افغانستان بیرون خواهند شد.

XS
SM
MD
LG