لینک‌های قابل دسترسی

خبر تازه
جمعه ۲۶ سنبله ۱۴۰۰ کابل ۰۴:۵۹

محب: ۲،۳۰۰ سرباز پناه‌برده افغان به تاجیکستان بازگشتانده شدند


آرشیف، نیروهای امنیتی افغانستان

مشاور امنیت ملی افغانستان می‌گوید، ۲،۳۰۰ تن از سربازان افغان که به تاجیکستان پناه برده بودند، دوباره به صفوف‌شان باز گشته اند.

حمدالله محب روز سه‌شنبه (۱۵ سرطان) به خبرنگاران در کابل گفت که سربازان بازگشته، برای امنیت و دفاع از شهر فیض‌آباد موظف شده‌اند.

محب می‌گوید: "۲،۳۰۰ تن از نیروها دوباره بازگشته اند و با نیروهای امنیتی و دفاعی افغانستان پیوسته اند. بعضی از آن‌ها که ولسوالی‌ها را ترک کرده بودند، اکنون در چهارچوب نیروهای دفاعی در مراکز ولایت‌ها حضور دارند. آن‌هایی که به تاجیکستان پناه برده بودند، دوباره برای خدمت و دفاع از مردم فیض آباد باز گردانده شده‌اند."

مشاور امنیت ملی افغانستان جزییات ارائه نکرد که بازگشت این سربازان چی زمانی آغاز شده و آن‌ها چگونه به افغانستان منتقل شده‌اند.

حمدالله محب، مشاور شورای امنیت ملی افغانستان
حمدالله محب، مشاور شورای امنیت ملی افغانستان

به دنبال شدت یافتن جنگ‌ها و حمله‌های طالبان در شمال و شمال‌شرق افغانستان، صدها تن از نیرو های امنیتی از بدخشان به تاجیکستان پناه بردند.

ولسوالی‌های این ولایت هم به صورت پیهم به دست طالبان سقوط کرده‌اند.

خبرنگار رادیو آزادی در شمال‌شرق افغانستان به نقل از مقام‌های محلی و نماینده‌های ولایت بدخشان در شورای ملی گزارش می‌دهد که از میان ۲۷ ولسوالی بدخشان، تنها کران و منجان در دست دولت و متباقی ۲۶ ولسوالی دیگر در ادارۀ طالبان است.

تاجیکستان به شدت از خرابی وضعیت امنیتی در مناطق مرزی افغانستان با این کشور نگران است.

امام علی رحمان، رئیس جمهور تاجیکستان روز دوشنبه (۱۴ سرطان) دستور داد که ۲۰ هزار نیرو در مرز میان کشورش و افغانستان گماشته شوند.

رحمان وضعیت امنیتی افغانستان را نگران کننده دانسته و از اداره‌‌های امنیتی کشورش خواسته است با اقدام‌های مشخص در مرز این کشور با افغانستان، امنیت تاجیکستان و شهروندانش را قطعی کنند.

امام علی رحمان، رئیس جمهور تاجیکستان
امام علی رحمان، رئیس جمهور تاجیکستان

روسیه هم که یک پایگاه نظامی بزرگ در تاجیکستان دارد، دیروز گفت که در صورت نیاز برای ثبات مرزهای تاجیکستان با افغانستان، آمادۀ هر گونه همکاری است. هلیکوپترهای روسیه هم تمرینات نظامی را در خاک تاجیکستان راه اندازی کرده‌اند.

افغانستان حدود ۱،۳۷۵ کیلومتر مرز مشترک با تاجیکستان دارد.

مقام‌های تاجیکستان روز دوشنبه (۱۴ سرطان) گفتند که طالبان، ۹۰۰ کیلومتر مرز میان این کشور و افغانستان را تحت کنترول خود دارند.

XS
SM
MD
LG