کمپاین سراسری تطبیق واکسین در افغانستان آغاز شد

وزارت صحت عامهٔ حکومت طالبان به روز دوشنبه اعلام کرد که کمپاین تطبیق واکسین ضد پولیو یا فلج را در سراسر افغانستان آغاز می‌کند.

شرافت زمام، سخنگوی این وزارت به رادیو آزادی گفت که این هشتمین کمپاین واکسین ضد پولیو در افغانستان است که امسال راه اندازی میشود.

به گفتهٔ او، پیش از این شش کارزار سراسری و یک کارزار فرعی تطبیق واکسین عملی شده که ظاهرا نتیجه‌بخش بوده است:

"کمپاین یاد شده، چهار روز ادامه دارد، و نزدیک به ۹،۹ میلیون کودک افغان واکسین خواهند شد، پیش از این نیز وزارت صحت کارزارهای مختلف را برگزار کردند، تا افغانستان عاری از پولیو داشته باشیم."

وزارت صحت عامهٔ حکومت طالبان این کمپاین را به همکاری شماری از اداره‌های جهانی تطبیق می‌کند و امیدوار است که با عملی شدن آن٬ موارد ابتلای اطفال به پولیو در افغانستان کاهش یابد.

به اساس معلومات وزارت صحت عامهٔ حکومت طالبان، سال روان دو واقعه مثبت پولیو در در ولایت های پکتیکا و کنر ثبت شده است.

این وزارت از همه مقام‌های محلی و بزرگان قومی، علمای دینی و والدین خواسته است تا برای تطبیق موفقانهٔ این کارزار با افراد موظف تطبیق کنندهٔ واکسین٬ همکاری کنند.

افغانستان و پاکستان هنوز هم تنها دو کشور در جهان هستند که پولیو در آن از بین نرفته و به اساس معلومات سازمان ملل متحد، برای از بین بردن آن این بیماری به تلاش بیشتر نیاز است.

پولیو یک بیماری ویروسی است که تداوی ندارد و تنها به واسطهٔ واکسین می‌توان از ابتلا به آن جلوگیری کرد.