رئیس جمهور افغانستان به مشاور امنیت ملی، لوی درستیز اردوی ملی، معین ارشد امنیتی وزارت داخله و معاون ولایتی ریاست عمومی امنیت ملی مدال‌های عالی دولتی را تفویض کرد.
ریاست جمهوری افغانستان می‌گوید که مدال عالی دولتی غازی وزیر محمد اکبر خان به محمد حنیف اتمر و مدال‌های عالی دولتی شجاعت به قدم شاه شهیم، عبدالرحمن رحمن و عبدالمتین بیک امروز طی مراسمی در ارگ اعطاء شد.
در خبرنامه ریاست جمهوری افغانستان آمده است که رئیس جمهور اشرف غنی از خدمات ارزنده و صادقانه مشاور امنیت ملی در زمینه هماهنگی بیشتر میان قوای مسلح و جلب همکاری‌های منطقوی و بین‌المللی جهت تقویت و تجهیز نیرو‌های امنیتی و دفاعی، مبارزه با تروریزم و تأمین صلح و ثبات به نیکی یاد کرد.
در این خبرنامه همچنان گفته شده است که رئیس جمهور از خدمات ارزنده لوی درستیز اردوی ملی، معین ارشد امنیتی وزارت داخله و معاون ولایتی ریاست عمومی امنیت ملی در راستای تأمین امنیت، ثبات و مبارزه با تروریزم قدردانی کرد.