رئیس اجرائیه افغانستان میگوید، در ملاقات با رؤسای جمهور پاکستان و ترکمنستان برعلاوه روابط دو جانبه روی روند صلح افغانستان و مبارزه با تروریزم بحث و گفتگو کردهاست.
خبرنگار رادیو آزادی از شهر دوشنبه میگوید، عبدالله عبدالله صبح امروز به شماری از خبرنگاران که او را در سفرش به تاجکستان همرایی میکنند معلومات داد که در ملاقات با ممنون حسین رئیس جمهور پاکستان روی نقش پاکستان در تأمین ثبات در افغانستان بحث کردهاست.
بهگفته رئیس اجرائیه افغانستان، ممنون حسین رئیس جمهور پاکستان کشته شدن ملا فضلالله رهبر تحریک طالبان پاکستانی در ولایت کنر را یک گام خوب خواند و عبدالله عبدالله نیز خواهان اقدام در برابر مخالفین مسلح دولت افغانستان در قلمرو پاکستان شد.
همچنان رئیس اجرائیه افغانستان در دیدارش با قربانقلی بیردی محمداف رئیس جمهور ترکمنستان روی مسایل اقتصادی و انرژی صحبت کردهاست.
عبدالله عبدالله رئیس اجرائیه افغانستان که برای اشتراک در یک کنفرانس زیر عنوان "آب برای توسعه پایدار" به شهر دوشنبه رفته است، قرار است امروز با امام علی رحمان رئیس جمهور تاجکستان نیز ملاقات کند.
گفته میشود که در این ملاقات برخی توافقنامهها نیز میان کابل و دوشنبه امضأ خواهند شد.