مقامات میدان وردگ از کشته شدن ده‌ها نفر از شورشیان طالب خبر می‌دهند.
مقامات ولایت میدان وردگ می‌گویند که در عملیات هوایی و زمینی شب گذشته در این ولایت ۳۱ نفر از شورشیان طالب به شمول چندین قوماندان مشهور آنها بنام‌های قاری سید آغا، قوماندان ارسلا، ملا فیض، قاری خالد، ملا عابد و حمیدالله کشته شده‌اند.
مقامات می‌گویند برخی از این قوماندانان در کابل هم عملیات می‌کردند.
اعلامیه قوماندانی امنیه میدان وردگ می‌افزاید که ۳۵ تن دیگر از طالبان به شمول ولسوال نام‌نهاد آنها برای ولسوالی نرخ زخمی شده‌اند.
طالبان هنوز در مورد چیزی نگفته اند.
میدان وردگ در جوار کابل موقعیت دارد و از این عملیات در حالی گزارش می‌شود که در حملۀ انتحاری و گروهی روز دوشنبه در کابل شش نفر کشته و به شمول شاگردان مکتب ده‌ها نفر دیگر زخمی شده‌اند.