نماینده خاص جرمنی برای افغانستان و پاکستان می‌گوید، نشست "دیالوگ بین‌الافغانی" در قطر یک مرحله اعتمادسازی، بین اطراف درگیر بود.
مارکس پوتزل دیروز هنگام ملاقات با صلاح‌الدین ربانی وزیر خارجۀ افغانستان گفت، مرحله بعدی نشست "دیالوگ بین‌الافغانی" همه‌جانبه و پر از دستاورد خواهد بود.
در یک اعلامیۀ وزارت خارجۀ افغانستان گفته شده که آقای پوتزل نشست "دیالوگ بین‌الافغانی" را قناعت‌بخش خوانده است.
این نشست به روزهای یکشنبه و دوشنبه به میزبانی کشورهای جرمنی و قطر در شهر دوحه پایتخت قطر دایر شد و با صدور یک قطعنامۀ هشت ماده‌ای پایان یافت.در نشست "دیالوگ بین‌الافغانی" در شهر دوحه، ۷۱ تن از اعضای جامعۀ مدنی، شورای ملی، زنان، سیاسیون، کارمندان رسانه‌ها، مقامات حکومت افغانستان و نمایندگان طالبان اشتراک داشتند.