مقام‌های تاجیکستان می‌گویند ۷۵ درصد واجدان شرایط رأی‌دهی در انتخابات پارلمانی امروز یکشنبه (۱ مارچ) در این کشور سهم گرفتند.
بعد از اینکه فعالیت نهضت اسلامی تاجیکستان که یک حزب پیشتاز مخالفین پنداشته می‌شد ۵ سال پیش ممنوع گردید این اولین انتخابات پارلمانی در این کشور می‌باشد.
کمیسیون مرکزی انتخابات تاجیکستان گفت تا ساعت سه بعد از ظهر امروز به وقت محلی حدود ۳،۷ میلیون نفر که ۷۵ درصد مجموع رأی دهندگان را تشکیل می‌دهند در انتخابات سهم گرفتند.
این رقم از ۵۰ درصد که انتخابات را اعتبار قانونی می‌بخشد بسیار بلندتر است.
هیچ یکی از انتخاباتی که در دو دهۀ اخیر در تاجیکستان صورت گرفته از سوی ناظران غربی آزاد و قابل رقابت خوانده نشده است.
انتظار می‌رود، حزب دموکراتیک مردم به رهبری رئیس جمهور امام علی رحمان، اکثریت ۶۳ کرسی پارلمان را به دست آورد.
سه حزب دیگرِ نسبتاً کوچک هم در انتخابات امروز تاجیکستان سهم داشتند.