وزارت خارجه افغانستان می‌گوید ۱۲۶ تن شهروندان زندانی افغان که مورد عفو رئیس جمهوری ترکمنستان قرار گرفته بودند آزاد و امروز دوشنبه به مسئولین افغان تسلیم داده شدند.
گران هیواد سخنگوی وزارت خارجه افغانستان در پیامی که به رسانه ها فرستاده گفته است که از این جمله ۵۸ تن در فاریاب و ۶۸ تن در هرات به مسئولین افغان سپرده شدند.
از سویی هم عبدالقادر مالیه معاون والی جوزجان به رادیو آزادی گفت که مقام‌های ترکمنستان نزدیک به ۶۰ زندانی افغانستان در آن کشور را امروز دوشنبه (۲۹ ثور) در گذرگاه تجارتی آقینه به جانب افغانستان سپردند.
او بعد از چاشت امروز دوشنبه به رادیو آزادی گفت: "من به نمایندگی از افغانستان ۵۸ زندانی افغان را که در کشور ترکمنستان محبوس بودند، در بندر تجارتی آقینه تسلیم گرفتم."
به گفتۀ معاون والی جوزجان، این زندانیان از ولایت‌های جوزجان، فاریاب، بلخ، بغلان و غور اند.
قربانقلی بیردی محمدوف، رئیس جمهوری ترکمنستان در فرمانی ۱،۴۰۲ زندانی را عفو کرد.
در جمع این زندانیان ۲۰۰ زندانی خارجی شامل هستند.
اما مقام‌های ترکمنستان نگفتند که آن‌ها به چه جرمی بازداشت شده‌اند.