زلمی خلیلزاد نمایندهٔ ویژه وزارت خارجه امریکا برای صلح افغانستان می‌گوید، رهبران طالبان و مقام‌های امریکایی در بارهٔ سرمایه‌گذاری ایالات متحده پس از تامین صلح در افغانستان گفت‌وگو کردند.
زلمی خلیلزاد این را دیروز جمعه در حساب توییترش نوشته و گفته که این دیدار با اشتراک ملابرادر رئیس دفتر سیاسی طالبان در قطر و ادام بوهلیر رئیس اداره انکشاف بین‌المللی امریکادر دوحهٔ قطر برگزار شد.
در این دیدار در بارهٔ احتمال سرمایه‌گذاری مشترک امریکا و قطر در افغانستان بحث شد.
طالبان هم از جانب خود این دیدار را تأیید کردند.
آنها گفتند، در گفت‌و‌گوی شان در بارهٔ رشد اقتصاد آیندهٔ افغانستان، بازسازی و انکشاف آن و همچنان برنامه‌های آقای بوهلیر بحث شد.
در اعلامیه طالبان آمده که در دیدار دیروز جمعه آنها روی روند صلح، رهایی زندانیان، آغاز مذاکرات بین افغانان و سایر مسایل نیز با جانب امریکایی صحبت شد.