امروز در مکاتب دولتی و خصوصی افغانستان تدریس حضوری آغاز می‌شود

امروز شنبه (۱ سنبله) درهمۀ مکاتب دولتی و خصوصی در افغانستان تدریس حضوری به شکل محدود آغاز می‌شود.

وزارت معارف می‌گوید به اساس رهنمودهای وزارت صحت عامه تدریس حضوری در برخی صنوف مشخص این مکاتب آغاز می‌شود.

نوریه نزهت سخنگوی این وزارت دیروز به رادیو آزادی گفت: "به اساس رهنمود آغاز حضوری مکاتب، شنبه مکاتب دولتی صنوف یازدهم و دوازهم و مکاتب خصوصی از صنف اول الی دوازدهم دروس حضوری خود را آغاز می‌کنند."

سخنگوی وزارت معارف می‌افزاید که دربارۀ تدریس حضوری در بقیۀ صنوف مکاتب دولتی منتظر رهنمود وزارت صحت عامه می‌باشند.

یونیسف یا صندوق ملل متحد برای اطفال درماه ثور گفته بود که ۹ ملیون و ۵ صدهزار کودک درافغانستان دراثر شیوع کرونا از درس و تعلیم محروم شده اند.