مقام‌های لغمان می‌گویند، نیروهای امنیتی افغان در جریان عقب‌زنی حمله‌های طالبان در ولسوالی علی‌شنگ ۲۵ شورشی طالبان را کشته اند.
قوای هوایی در این درگیری‌ها نیروهای امنیتی افغان را حمایت می‌کردند.
اسدالله دولت‌زی سخنگوی والی لغمان امروز دوشنبه (۱۷ سنبله) به رادیو آزادی گفت، در این حمله‌ها ۸ شورشی دیگر طالبان زخمی شده‌اند.
وی می‌گوید: "طالبان مسلح دیشب بر پوستۀ امنیتی جبون حمله گروهی کردند. در حال حاضر حملات‌شان عقب زده شده و به آن‌ها تلفات وارد گردیده که در میان کشته شده‌ها پنج تن کسانی اند که سلاح لایزی استفاده می‌کردند."
طالبان تاکنون در باره این حمله تهاجمی‌شان چیزی نگفته اند.