زلمی خلیل‌زاد نماینده خاص امریکا برای صلح افغانستان می‌گوید، ایالات متحده بعد از صلح نیز در مبارزه علیه تروریزم با افغانستان کمک می‌کند تا کشورهای منطقه و جهان امن باشند.
خلیل‌زاد در پاسخ به این سوال بخش تاجیکی رادیو آزادی که کشورهای آسیای میانه چگونه اطمینان حاصل کنند که بعد از صلح در افغانستان، تهدیدی از این کشور متوجه آنها نیست گفت: "این تنها نگرانی کشورهای همسایه و منطقه نیست بلکه نگرانی تمام جهان است. آنچه جهان به شمول تاجیکستان می‌خواهد برقراری صلح در افغانستان است تا از آنجا به کدام کشور دیگر تهدید متوجه نشود."
آقای خلیل‌زاد در ادامه سفرهایش به هدف صلح افغانستان به تاجیکستان رفته بود. وی همکاری کشورهای آسیای میانه برای صلح افغانستان را مهم خوانده است.