اتحادیه کارخانه‌های ذوب آهن افغانستان می‌گوید، از زمانی که حکومت فروش آهن‌پاره‌های دولتی به آن‌ها را منع کرده، این آهن‌پاره‌ها به کشورهای همسایه به ویژه پاکستان قاچاق می‌شود.
احمد پیمان، رئیس اتحادیه صنایع افغانستان در صحبت با رادیو آزادی از حکومت خواست که روند فروش آهن‌پاره‌های دولتی به کارخانه‌های خصوصی را از سر گیرد.
به گفته آقای پیمان، در افغانستان ۵۰ کارخانه در زمینه ذوب آهن سرمایه‌گذاری کردند، اما حالا تنها ۱۰ کارخانه ذوب آهن فعالیت دارند.
آقای پیمان می‌گوید، به دلیل کمبود آهن‌پاره، تولیدات این کارخانه‌ها ۳۰ در صد کاهش یافته است.
شمروزخان مسجدی سخنگوی وزارت مالیه در پاسخ به این نگرانی می‌گوید، در حال حاضر دادن آهن داغمه دولتی به این کارخانه‌ها به صورت موقت متوقف شده است. به گفته او، حکومت تلاش می‌کند برای فروش شفاف آهن داغمه در چند روز آینده راهکار جدیدی تهیه کند.
خان استیل، میهن، میثم، فولاد، جاوید افغان و برخی دیگر کارخانه‌های ذوب آهن است که همه ساله صدها تن سیخ، گادر، انگلارن مورد نیاز مردم را تولید می‌کنند.