عبدالله عبدالله رئیس شورای عالی مصالحه ملی در ملاقات با محمد طاهر ذاکر زاده رئیس مجلس نمایندگان تاجیکستان در مورد روند صلح افغانستان صحبت کرده.
مجیب الرحمن رحیمی مشاور ارشد شورای عالی مصالحه ملی امروز دوشنبه (اول جدی) در این مورد به رادیو آزادی از دوشنبه پایتخت تاجیکستان گفت: "در این نشست، روی تلاش‌های صلح در افغانستان و نقش تاجیکستان، نقش کشور‌های منطقه در حمایت از پروسه صلح، روابط میان پارلمان دو کشور و همچنان روابط دو جانبه مورد بحث قرار گرفت."
رحیمی گفت که آقای عبدالله قرار است که امروز دوشنبه (اول جدی) با صدراعظم و وزیر امور خارجه تاجیکستان ملاقات کند و فردا هم با رئیس جمهور آن کشور امام علی رحمان.
آقای عبدالله صبح امروز دوشنبه وارد دوشنبه شد.
این سفر دو روزه به سلسلۀ دیدار آقای عبدالله از کشور‌های منطقه به هدف جلب حمایت منطقه‌یی از پروسه صلح افغانستان صورت می‌گیرد.
آقای عبدالله پیش ازین، از چند کشور دگر منطقه، پاکستان، ایران، هند و ازبکستان هم دیدار کرده.