عبدالله عبدالله رئیس شورای عالی مصالحۀ ملی افغانستان امروز (سه شنبه ۲۲ دسمبر) با امام علی رحمان رئیس جمهور تاجیکستان در مورد پروسۀ صلح افغانستان گفت‌وگو کرد.
فریدون خوزون سخنگوی شورای عالی مصالحۀ ملی افغانستان به رادیو آزادی گفت: "در این دیدار در مورد پروسۀ صلح افغانستان، مذاکرات دوحه و دور بعدی آن صحبت شد. رئیس جمهور تاجیکستان با حمایت از پروسه صلح افغانستان گفت، صلح در افغانستان به معنی صلح، توسعه و ثبات در منطقه و فرا منطقه است."
به گفته آقای خوزون، رئیس جمهور تاجیکستان همکاری با روند صلح را تعهد کرده، گفته، تجارب کشورش را با افغانستان در میان می‌گذارد.
جنگ داخلی در تاجیکستان در سال ۱۹۹۲ آغاز شد و در سال ۱۹۹۷ میلادی از طریق گفت‌وگوهای صلح، پایان یافت.
آقای عبدالله روز گذشته به تاجیکستان رفت و هدف سفر وی ایجاد اجماع منطقه‌ای برای صلح افغانستان خوانده شده.
وی قبل از این به پاکستان، ایران، هند و ازبیکستان نیز سفر کرده.