عبدالله عبدالله رئیس شورای عالی مصالحه ملی افغانستان، فردا (چهارشنبه، ۲۷ حوت) به قصد اشتراک در نشست مسکو روانه روسیه می‌شود.
مجیب الرحمان رحیمی مشاور شورای عالی مصالحه ملی، در پیامی به رادیو آزادی همچنان گفت که شماری از سیاسیون افغان، در ترکیب هیئت با آقای عبدالله همراه استند. اما او از سایر اشتراک کننده‌ها نام نگرفت.
او گفت: "جمهوری اسلامی افغانستان، تحت سقف شورای عالی مصالحه ملی در این نشست اشتراک می‌کند و از یک موضع واحد، دیدگاه‌های جمهوری اسلامی افغانستان مطرح می‌شود."
یک منبع حکومت که می‌خواهد به دلیل حساسیت موضوع از او نام گرفته نشود، تأیید کرده که شماری از سیاسیون به شمول حامد کرزی رئیس جمهور پیشین، میر رحمن رحمانی رئیس ولسی جرگه، مارشال عبدالرشید دوستم معاون پیشین رئیس جمهور، گلبدین حکمتیار رهبر حزب اسلامی، محمد کریم خلیلی معاون پیشین رئیس جمهور و شمار دیگر از مقام‌ها و سیاسیون افغان با عبدالله عبدالله در نشست مسکو همراه خواهند بود.
طالبان گفته اند که هیئت ده نفری آن‌ها تحت رهبری ملا عبدالغنی برادر رئیس دفتر سیاسی این گروه در قطر، در نشست مسکو اشتراک خواهند کرد.
زلمی خلیل‌زاد نماینده ویژه امریکا برای صلح افغانستان در نشست پس فردا (۲۷ حوت) در مسکو اشتراک می‌کند.
جالینا پورتر یک سخنگوی وزارت خارجۀ امریکا شب گذشته (۲۵ حوت) به خبرنگاران گفت، نشست مسکو تکمیل کنندۀ تلاش‌های است که ستون اصلی پروسۀ صلح در افغانستان را تشکیل می‌دهد.