صدراعظم قرغیزستان در مورد کاهش تنش‌های اخیر سرحدی با تاجیکستان ابراز خوشبینی کرده است.
اولوک بیک ماریپوف صدراعظم قرغیزستان روز گذشته در گفتگو با قاهر رسول‌زاده همتای تاجیکستانی‌اش در شهر کازان در روسیه گفت: "ما به توافق‌های حاصل شده در مورد آتش‌بس، ادامه گفتگوهای سازنده و پیشنهاد کاهش تنش‌ها در سرحد به نظر مثبت می‌بینیم."
درگیری بین نیروهای قرغیزستان و تاجیکستان روز چهارشنبه در منطقۀ سرحدی باتکین بعد از درگیری ساکنان محل آغاز گردید و ۲۴ ساعت بعد بین دو طرف آتش‌بس اعلام شد.
در نتیجۀ این درگیری‌ها که در سه دهه گذشته بی‌سابقه بوده، بیش از ۴۰ تن کشته و ده‌ها تن دیگر زخمی شده اند.
ادارۀ خدمات سرحدی قرغیزستان امروز(شنبه اول می) گفت که تحرکات تجهیزات نظامی تاجیکستان را به سمت سرحد مشترک ثبت کرده است.
مقام‌های تاجیکستان تا هنوز در این مورد چیزی نگفته اند.