اداره رسیدگی و مبارزه با ویروس کرونا در تاجیکستان، به همه شهروندان این‌کشور که بالاتر از ۱۸ سال عمر دارند، دستور داده تا واکسین بیماری کووید۱۹ را بگیرند.
خاور، رسانه دولتی تاجیکستان روز شنبه (۳ جولای) گزارش داد که واکسین برای تمامی شهروندان بالغ، اجباری است.
تا اکنون گرفتن واکسین ضد ویروس کرونا در تاجیکستان، اختیاری بود. واکسین به صورت مجانی تطبیق می‌شود.
به گزارش خاور، تمامی شهروندان تاجیکستان که از خارج به کشور‌شان باز می‌گردند، با وجود داشتن آزمایش منفی، باید برای ده روز قرنطین شوند.
به این ترتیب محفل‌های عروسی و سایر مراسم با اشتراک شمار کمی از مردم محدود شده است.
بر اساس آمار رسمی، از آغاز همه‌گیری ویروس کرونا در تاجیکستان، بیش از ۱۳ هزار و ۵۰۰ تن به این ویروس مبتلا شده اند. ۹۲ تن هم جان باخته اند.
وزارت صحت تاجیکستان روز شنبه گفت که بیش از ۲۸۰ هزار تن در این کشور، در برابر ویروس کرونا واکسین شده اند.