برخی از سربازان و افسران افغانی که به تاجیکستان پناهنده شده اند می‌گویند که اگر مقام‌های تاجیکستان اجازه این کار را نمی‌دادند شاید که کشته می‌شدند.
در دو روز گذشته بیش از هزار سرباز و افسر افغان به تاجیکستان پناهنده شده اند.
محمد ظاهر، از مسئولان نیروهای مرزی در ولسوالی خواهان بدخشان، در میان بیش از ۱۰۰ پناهنده‌ای است که روز گذشته به منطقه شمس‌الدین شاهین عقب‌نشینی کردند.
آنها سلاح‌های خود را به مقام‌های تاجیک تحویل داده اند و در نزدیکی بازار مرزی در منطقه شمس‌الدین شاهین نگهداری می‌شوند.
او به بخش تاجیکستان رادیو آزادی گفت که دلیل عقب‌نشینی‌شان "پیوستن گروه بزرگی از خیزش‌های مردمی است که تصمیم گرفته بودند در کنار نیروهای دولتی علیه طالبان بجنگند."
به گفتۀ محمد ظاهر، این گروه مقدار زیادی سلاح و مهمات در اختیار داشتند.
او افزود: "خیزش‌های مردمی تجهیزات دولتی را به دست گرفتند، با طالبان معامله كردند. ما دیگر قدرت کافی برای مقاومت نداشتیم و به تاجیکستان آمدیم. اکنون ما در ساحل پل خواهان هستیم."
این افسر افغان گفته که مرزبانان تاجیک آنان را پذیرفته و محل اسکان و غذا برای‌شان فراهم کرده اند.
پل مرزی میان افغانستان و تاجیکستان
خواهان با یک پل بزرگ افغانستان را به ولسوالی شمس‌الدین شاهین وصل می‌کند.
در حال حاضر مشخص نیست که سرنوشت فراریان چه خواهد شد.
حکومت افغانستان تا اکنون به درخواست‌های رادیو آزادی در مورد تبصره در این مورد چیزی نگفته است.
مقام‌های تاجیکستان گفته اند که از ۲۲ جون به این طرف تقریباً ۱۶۰۰ سرباز افغان به خاک آن کشور پناه برده اند.
محمد ظاهر می‌گوید که آیندۀ آنها به تصمیم رهبران ارشد افغانستان بستگی دارد.
بیشتر در این باره: افزایش نبردها در افغانستان؛ ۱،۰۳۷ نظامی افغان به تاجیکستان فرار کردهانداو می‌افزاید: "مقامات ما باید با دولت تاجیکستان صحبت کنند و سپس تصمیم‌گیری کنند. ما مطابق تصمیم آنها عمل خواهیم کرد."
نبردها در ماه‌های اخیر در شمال افغانستان افزایش یافته.
برخی از مقام‌های محلی به رادیو آزادی گفته اند که بیش از ۲۰ ولسوالی از جمع ۲۷ ولسوالی در بدخشان به تصرف طالبان در آمده. مقام‌ها به دلیل حساسیت موضوع نخواسته اند که نامشان گرفته شود.
مقام‌های تاجیک دیروز(یک‌شنبه، ۱۳ سرطان) اعلام کردند که طالبان بیش از ۹۰۰ کیلومتر از مرز افغانستان با تاجیکستان را تحت کنترل خود درآورده اند.
اما مقام‌های افغان هنوز در این مورد مشخص چیزی نگفته اند.