یک منبع در نیروهای تنفیذ قانون تاجیکستان به بخش تاجیکستان رادیو اروپای آزاد/رادیو آزادی گفته است که حدود ششصد سرباز افغان از راه هوا از آن کشور به کابل منتقل شده اند.
به گفتۀ منبع، طیاره که از کابل پرواز کرده بود، در چهار پرواز از شام گذشته تا صبح امروز سربازان را انتقال داد.
آخرین پرواز حامل ۱۳۰ مسافر صبح امروز میدان هوایی کولاب را ترک کردند.
مقام‌های تاجیکستان در مورد اینکه چه تعداد سرباز افغان در تاجیکستان مانده اند، معلومات نمی‌دهند.
اما یک داکتر به بخش تاجیکستان رادیو آزادی/ رادیو اروپای آزاد گفته است که دستکم ۳ سرباز که در ولسوالی چاه آب افغانستان به شدت زخمی شده بودند، در یک شفاخانۀ تاجیکستان زیر معالجه استند.
حمدالله محب، مشاور امنیت ملی افغانستان روز سه‌شنبه در نشست خبری ای در کابل گفت که سربازانی که به تاجیکستان پناه برده بودند، دوباره برای خدمت و دفاع از مردم فیض آباد باز گردانده شده‌اند.
با شدت یافتن حمله‌های تهاجمی طالبان در شمال افغانستان، صدها سرباز افغان وارد تاجیکستان شدند.
نیروهای مرزی تاجیکستان گفته اند که پس از بیست و دوم ماه جون نزدیک به شانزده صد سرباز افغان به تاجیکستان پناه بردند.