نماینده‌گان طالبان که به مسکو سفر کرده اند روز گذشته به مقام‌های روسیه اطمینان داده اند که پیشرفت‌های آنها در میدان جنگ در افغانستان هیچ تهدید به روسیه و کشورهای آسیای میانه ایجاد نمی‌کند.
حملات اخیر طالبان در شمال افغانستان سبب شد که صدها سرباز افغان به تاجیکستان پناه ببرند- جایی که یک قرارگاه بزرگ روسیه مستقر است.
در پاسخ به این، حکومت تاجیکستان اعلام کرد که ۲۰هزار سرباز دیگر را به مناطق سرحدی با افغانستان می‌فرستد.
وزارت خارجه روسیه می‌گوید ضمیر کابولوف نماینده خاص روسیه برای افغانستان روز گذشته با هیئت طالبان در مسکو ملاقات کرده و از این گروه خواسته که نگذارد بحران افغانستان به آنسوی سرحدات سرایت کند.
وزارت خارجه روسیه می‌گوید از سوی طالبان اطمینان حاصل کرده اند که آنها سرحدات کشورهای آسیای میانه را پامال نخواهند کرد و امنیت کارمندان دیپلوماتیک و ماموریت‌های کنسلی را در افغانستان ضمانت می‌کنند.