وزارت صحت عامهٔ افغانستان می‌گوید، تاکنون ۸۰ هزار محصل واکسین شده و روند واکسیناسیون در میان دانشجویان پوهنتون‌ها و نهادهای تحصیلات عالی ادامه دارد.
دستگیر نظری سخنگوی این وزارت دیروز (۱۰ اسد) به رادیو آزادی گفت: "وزارت تحصیلات عالی حاضری محصلان را بر اساس کارت واکسین‌شان تنظیم کرده و تاکنون ۸۰ هزار محصل پوهنتون‌ها و نهادهای تحصلات عالی واکسین را دریافت کرده‌اند."
وزارت تحصیلات عالی هفتهٔ پیش اعلام کرد که درس‌های موسسات تحصیلات عالی در افغانستان ۱۶م ماه اسد، پس از واکسین دانشجویان آغاز می‌شود.
این وزارت واکسین بر دانشجویان را جبری اعلام کرده و گفته که دانشجویان نمی‌توانند بدون کارت واکسین داخل نهادهای تحصیلی‌شان شوند.
بر اساس آماری رسمی تاکنون نزدیک به ۱۴۸ هزار تن در افغانستان به ویروس کرونا مبتلا شده و این ویروس در مجموع جان حدود ۶،۸۰۰ تن را گرفته است.