حکومت ازبیکستان می‌گوید ۸۴ عسکر افغان را دستگیر کرده که از سرحد افغانستان با این کشور عبور کرده بودند.
به گفته ازبیکستان، شماری از عساکر دیگر افغان در پوستۀ کنترولی در آن سوی سرحد تجمع کرده اند.
وزارت خارجه ازبیکستان در اعلامیه‌ای گفته که به عساکر دستگیر شده‌ای افغان غذا، محل اقامت موقت و خدمات صحی ارائه کرده است.
به اساس اعلامیه، به نیروهای افغان که در قلمرو افغانستان در سرحد با ازبیکستان تجمع کرده اند کمک‌های بشری ارائه می‌شود. شهر ترمز، ازبیکستان را با پل موتر رو و خط ریل با حیرتان در افغانستان وصل می‌کند.
بعد از آنکه طالبان دیروز کنترل شهر مزارشریف را در دست گرفتند، به اساس گزارش‌ها، جنگجویان مربوط به عطامحمد نور و عبدالرشید دوستم و شماری از عساکر دولتی، به شهر حیرتان عقب نشینی کرده و شماری از آنها نیز وارد قلمرو ازبیکستان شده اند.