وزارت خارجه سویس می‌گوید که ماموریت خروج شهروندان سویسی و کارمندان افغان که با این کشور کار کرده‌اند، ناوقت دیروز ۲۴ اگست از افغانستان تکمیل شد.
رسانه‌های سویس اعلامیۀ را به نقل از اگنازیو کاسیوس، وزیر خارجه این کشور نشر کرده‌اند که در آن گفته شده که ۲۹۲ نفر مربوط به این کشور از افغانستان بیرون شده و ۶۰ نفر دیگر در حال حاضر در میدان هوایی منتظر اند که به ازبیکستان انتقال داده شوند.
کاسیوس گفته که طیاره حامل ۲۱۹ مسافر که ۱۴۱ آن‌ها کارمندان افغان و خانواده‌های آن‌ها اند، روز سه‌شنبه به میدان هوایی زوریخ رسید.
او از امریکا، جرمنی و ازبیکستان برای همکاری در ماموریت خروج شهروندان و کارمندان افغان که با این کشور کار کرده‌اند، ابراز سپاس کرد.
پس از تصرف کابل به تاریخ ۱۵ اگست از سوی طالبان، ماموریت خروج شهروندان خارجی و کارمندان افغان که با آن‌ها کار کرده‌اند از میدان هوایی بین‌المللی کابل آغاز شد.