محمد ظاهر اغبر سفیر افغانستان در دوشنبه پایتخت تاجیکستان مطالبهٔ حکومت طالبان در ارتباط به بازگرداندن نزدیک به هشت صد هزار دالر را رد کرده است.
او دیروز جمعه (سوم جدی) در شهر دوشنبه به خبرنگاران گفت که حکومت طالبان را به رسمیت نمی‌شناسد و آنها حق ندارند که باز گرداندن این پول‌ها را بخواهند: "اینها کی هستند که از ما مطالبه می‌کنند که پول را برگردانید؟ سفارت افغانستان بازهم تکرار می‌کنم خانه کوچکی است. افغانستان است در اینجا. در اینجا زمینی به مساحت ده هزار مترمربع، ساختمان، دپلوماتان و مردمانی با ما اند. ما ممکن پول زیاد پیدا کنیم و ما برای مردم افغانستان خدمت می‌کنیم."
ظاهر اغبر همزمان تأیید کرد که نامهٔ را حکومت طالبان در باره فرستادن ۷۶۸ هزار دالر پول به آنها بدست آورده است.
اما ذبیح الله مجاهد سخنگو و معاون وزارت اطلاعات و فرهنگ حکومت طالبان شام دیروز جمعه در صحبت با رادیو آزادی از فرستادن نامه به سفارت افغانستان در شهر دوشنبه تاجیکستان در ارتباط برگرداندن این پول ابراز بی‌خبری کرد.
گفته می‌شود که این مبلغ پس از سقوط نظام جمهوریت به ظاهر اشتباهاً به سفارت افغانستان به شهر دوشنبه فرستاده شده است.