حکومت طالبان: سهولت صدور ویزه عاجل برای سرمایه گذاران فراهم می‌شود

حکومت طالبان تصمیم گرفته که بعد از این به سرمایه گذاران و تجار خارجی که به افغانستان می آیند در میدان هوایی ویزه عاجل داده می‌شود و دیگر سهولت ها هم برایشان فراهم می‌گردد.

انعام الله سمنگانی معاون سخنگوی حکومت طالبان در این مورد در توییتر خود نوشته است.

او گفته که این تصمیم در مجلس کمیسیون اقتصادی که تحت رهبری عبدالغنی برادر معاون رئیس الوزرای حکومت سرپرست طالبان دیروز پنجشنبه برگزار شد، اتخاذ گردید.

برای ایجاد سهولت بیشتر به سرمایه گذاران، حکومت طالبان همچنان تعهد کرده که در میدان هوایی یک دفتر مشترک وزارت خارجه، وزارت داخله، وزارت تجارت و ریاست امنیت ملی را تشکیل می‌دهد.