کمیسیون اقتصاد وزارت مالیهٔ حکومت طالبان به بانک مرکزی افغانستان به رهبری طالبان و اتحادیهٔ صرافان وظیفه سپرده تا طرح این بانک برای فعالیت صرافان را یک بار دیگر مرور کنند.
نشست روز چهارشنبهٔ این کمیسیون را ملا عبدالغنی برادر، معاون اقتصادی ریاست الوزرا رهبری می‌کرد.
ارگ در صفحهٔ توییتر‌ش نوشته است، بر اساس طرحی که بانک مرکزی برای صرافان تهیه کرده بود، هر صراف باید جواز کار داشته باشد، ۵ میلیون افغانی برای بانک مرکزی ضمانت بدهد و شرکت خدمات پولی هم باید ۵۰ میلیون افغانی به گونهٔ نقدی نزد بانک مرکزی داشته باشد.
اما این طرح بانک مرکزی با واکنش جدی اتحادیهٔ صرافان مواجه شد.
به گفتهٔ این اتحادیه، این شرایط برای صرافان دشوار است و آن‌ها نمی‌توانند این را عملی کنند.
بانک مرکزی به رهبری طالبان این طرح را نزدیک به یک ماه پیش برای صرافان ارایه کرده بود.
