وزارت صحت عامه حکومت طالبان می‌گوید، دور پنجم کمپاین تطبیق واکسین پولیو در افغانستان امروز (دوشنبه) آغاز می‌شود.
به اساس معلومات وزارت صحت عامه حکومت طالبان این روند تا روز پنجشنبه دوام می‌کند.
نیک ولی شاه مومن مسئول مرکز ملی عملیات اضطراری محو پولیو ابراز امیدواری کرد که این وزارت مانند کمپاین های قبلی بتواند در این دور هم ۹. ۹ میلیون کودک را واکسین کند: "یک کمپاین سراسری تطبیق واکسین را در این هفته شروع می‌کنیم که از روز دوشنبه آغاز تا روز پنجشنبه دوام می‌کند. صرف در ولایت پکتیکا به خاطر زلزله این کمپاین با تاخیر برگزار خواهد شد."
بر اساس آمار وزارت صحت عامه حکومت طالبان از شروع سال تاکنون یک واقعۀ مثبت پولیو در ولایت پکتیکا ثبت شده در حالیکه سال گذشته در افغانستان چهار واقعه مثبت وجود داشت.
بیماری پولیو یا فلج اطفال در سراسر جهان به استثنای افغانستان، نایجیریا و پاکستان ریشه کن شده است.
پولیو بیماری ویروسی است که از یک شخص به شخص دیگرسرایت می‌کند.
ویروس با آسیب رساندن به نخاع یا رشته مهم عصبی که در میان ستون فقرات جای دارد، سبب فلج بدن می‌شود.