شماری از کارمندان حکومت طالبان: با مشکلات اقتصادی مواجه هستیم

در حالی که چند روز محدود به فرا رسیدن عید قربان باقی مانده است، شماری از کارمندان تنقیص شدۀ اداره‌های دولتی از سوی حکومت طالبان می‌گویند تا حال بیکار اند و با مشکلات زیاد اقتصادی روبه‌رو هستند.

احمدشاه و سید جعفر، دو تن از آنان به رادیو آزادی گفتند، پیش از این با گرفتن حقوق ماهوار مشکلات خانواده‌های‌شان را حل می‌کردند، اما امسال نه توان خرید مواد خوراکی را دارند و نه هم برای عید آمادگی گرفته اند.

این در حالیست که به تازگی وزارت مالیۀ حکومت طالبان اعلام کرده است که معاش ماه سرطان کارمندان ادارات دولتی را قبل از فرا رسیدن عید قربان پرداخت می‌کند.

احمد ولی حقمل سخنگوی این وزارت گفته است که تمام ادارات دولتی باید استحقاق معاش کارمندان شان را هرچه زود تر جهت اجراآت به این وزارت بفرستند.