تیم ملی کریکت افغانستان دوشنبه آینده به مصاف تیم سریلانکا می‌رود

انتظار می‌رود که به سلسله مسابقات جام جهانی کریکت ۲۰۲۳، تیم ملی کریکت افغانستان دوشنبه آینده با سریلانکا به میدان برود.

افغانستان دیروز دوشنبه پس از شکست دادن پاکستان در شهر چینای هند، در رده بندی تیم‌های اشتراک کننده در این جام، در جایگاه ششم قرار گرفت.

این نخستین بار است که افغانستان، در جام جهانی کریکت، پاکستان را شکست می‌دهد.

شماری از سیاستمداران افغان این پیروزی تیم ملی کریکت افغانستان را تاریخی خوانده اند.

محمد اشرف غنی رئیس جمهور مخلوع، حامد کرزی رئیس جمهور سابق و عبدالله عبدالله، رئیس پیشین شورای عالی مصالحه ملی، در پیام‌های جداگانه این پیروزی را تبریک گفته اند.

رهبری حکومت طالبان نیز در صفحۀ ایکس یا توییتر سابق ارگ نوشته است، این بازی نشان داد که جوانان افغان در هر میدان استعداد دارند و می‌توانند پیروز شوند.

افغانستان پیش از این انگلستان را نیز مغلوب کرده است.