نخستین محمولهٔ کمک‌های بشردوستانهٔ ایران به سیل‌زده‌گان در افغانستان دیروز به این کشور رسید. به گزارش خبرگزاری مهر، راضیه عالیشوندی، معاون امور بین‌الملل جمعیت هلال‌احمر ایران، اعلام کرده است که این کمک‌ها در چارچوب همکاری‌های بشردوستانه به افغانستان ارسال شده است.
مقامات محلی طالبان در ولایت بلخ اظهار کرده‌اند که طیارهٔ حامل این کمک‌ها، شامل مواد خوراکی، دوا، فرش، کمپل، چادرکت و خیمه، روز پنج‌شنبه در میدان هوایی شهر مزار شریف نشست کرده است. برخی از ولایت‌های افغانستان از جمله بغلان، غور و فاریاب، طی دو هفتهٔ اخیر شاهد سرازیر شدن سیل‌های ویران‌گر و مرگ‌بار بوده‌اند. بر اثر این سیل‌ها، علاوه بر وارد شدن خسارات هنگفت مالی به مردم، صدها نفر نیز کشته و زخمی شده‌اند.