تاجیکستان می‌گوید از ماه جنوری تا اگست امسال به ارزش ۸۲ میلیون دالر به افغانستان و ازبیکستان برق صادر کرده است.
به اساس گزارش رسانه‌های تاجیکستان، این صادرات نسبت به عین مدت زمان سال گذشته تقریباً سه میلیون دالر کمتر است.
تولید برق در تاجیکستان در این مدت به ۱۵.۴ میلیارد کیلووات ساعت رسیده که از جمله حدود یک میلیارد کیلووات ساعت یا ۶.۵ فیصد صادر شده است. از این مقدار، ۸۰ فیصد به افغانستان و متباقی ۲۰ فیصد به ازبیکستان صادر شده است.
تاجیکستان در سال ۲۰۲۴ قراردادهای صادرات برق با این دو کشور همجوار خود امضا کرد. تاجیکستان صرف در تابستان به ازبیکستان برق صادر می‌کند ولی بیشتر در فصل‌های خزان و زمستان به افغانستان صادرات برق دارد.
افغانستان تا ۷۰ فیصد برق مورد نیاز خود را از کشورهای همجوار از جمله ازبیکستان، تاجیکستان، ترکمنستان و ایران وارد می‌کند.