وزارت تحصیلات عالی حکومت طالبان فعالیت هفت پوهنتون خصوصی را بهدلیل آنچه «محصلان خیالی» و تخلفهای اداری خوانده، برای یک سال تعلیق کرده و جواز فعالیت دو پوهنتون خصوصی دیگر را بهگونه دایمی لغو کرده است.
این وزارت روز یکشنبه، ۱۸ اسد در صفحه ایکس نوشته که فعالیت پوهنتونهای خصوصی «برلاس» در جوزجان، «راه سعادت» و «ترکستان» در بلخ، «ازهر» و «برنا» در بدخشان، «رشاد» در فاریاب و «پیام» در کابل برای یک سال تعلیق شده است.
همچنان جواز فعالیت پوهنتونهای خصوصی «کهندژ» در قندوز و «خانه دانش» در تخار بهگونه دایمی لغو شده است.
وزارت تحصیلات عالی طالبان گفته است که این پوهنتونها با کمبود امکانات آموزشی، لابراتوار و تجهیزات روبهرو بوده و در برخی موارد نصاب تأییدشده از سوی این وزارت نیز تدریس نمیشده است.
به گفته این وزارت، در برخی پوهنتونها محصلان طب در بخشهای عملی حضور نداشتند و در فهرست حاضری نیز «موارد جعل و تغییر معلومات» دیده شده است.
طالبان پیش از این نیز فعالیت برخی پوهنتونهای خصوصی را تعلیق کرده بودند.
مسئولان این پوهنتونها تاکنون در این مورد چیزی نگفتهاند.
بر اساس آمار وزارت تحصیلات عالی طالبان، در حال حاضر ۱۲۰ مؤسسه و پوهنتون خصوصی در افغانستان بهگونه رسمی فعالیت دارند.