اولین بازی لیگ اتصالات شپگیزهٔ کریکت امروز ( یکشنبه ۱۶ سنبله) در کابل برگزار می‌شود.
بر اساس جدول تعیین شدهٔ کریکت بورد افغانستان به سلسلهٔ این بازی‌ها امروز (یکشنبه) تیم کریکت بند امیر و تیم کریکت قهرمانان مس عینک به مصاف هم می‌روند.
محمد اشرف غنی رئیس جمهور افغانستان در سخنرانی‌اش در مراسم افتتاح بازی‌های لیگ شپگیزه گفت، تیم ملی کریکت افغانستان وحدت ملی افغانها را به جهان نشان می‌دهد.
او گفت، افغانستان را کسی تقسیم کرده نمی‌تواند و کسی همچنان پای خود را بر اراده ملی افغانستان واحد گذاشته نمی‌تواند.
او افزود، تیم ملی کریکت تنها یک تیم نیست، بلکه در آینده حکایت است که همه خود را در آن می‌بینند.
محمد اشرف غنی گفت: "کریکت برای افغانها یک بازی نیست، یک عزت است و یک افتخار است. شما پرچم جمهوریت را به افتخار در همهٔ جهان بلند کنید."
مراسم دیروزی افتتاحیه لیگ شپگیزه در میدان بین‌المللی کریکت کابل برگزار شده بود. این هفتمین سالیست که این بازی‌ها برگزار می‌شوند و تا ۱۶م ماه سپتمبر دوام می‌کند.
فرید هوتک مسئول مطبوعاتی کریکت بورد افغانستان شام دیروز شنبه (۱۵ سنبله) به رادیو آزادی در مورد بازی‌های لیگ شپگیزه گفت: "از طرف کریکت بورد افغانستان میان شش تیم امروز «یکشنبه» لیگ اتصالات شپگیزه آغاز می‌شود. در این لیگ بازیکنان تیم ملی کریکت افغانستان نیز اشتراک می‌کنند."
او گفت، در این بازی‌ها سفارش‌های سازمان صحی جهانی و وزارت صحت عامه افغانستان در ارتباط به پوشیدن ماسک و فاصلهٔ فزیکی به خاطر جلوگیری از ویروس کرونا، در نظر گرفته می‌شود.
