لینک‌های قابل دسترسی

خبر تازه
دوشنبه ۱۳ سرطان ۱۴۰۱ کابل ۱۱:۲۳

نشست دو روزه در دوشنبه در مورد افغانستان برگزار می‌شود


قصر ریاست جمهوری تاجیکستان. عکس جنبه تزئینی دارد

شهر دوشنبه پایتخت تاجیکستان سر از امروز میزبان نشست دو روزه در بارۀ افغانستان خواهد بود.

گزارش شده است که مشاوران امنیت ملی کشور‌های منطقه در این نشست اشتراک خواهند کرد.

نشست امروز در شهر دوشنبه پس از آن آغاز می‌شود که اخیراً چند نشست در بارۀ اوضاع افغانستان در شماری از کشور‌های دیگر منطقه برگزاری شده است.

گزارش شده است در این نشست که تا روز جمعه ادامه می‌یابد، در مورد اوضاع بشری، اقتصادی، سیاسی و امنیتی افغانستان بحث می‌شود.

مشاوران امنیت ملی هند، روسیه، چین، ایران و کشور‌های آسیای میانه در نشست دو روزه در تاجیکستان اشتراک خواهند کرد.

اما در مورد اشتراک پاکستان تا هنوز گزارشی در دست نیست.

آجیت دووال مشاور امنیت ملی هند
آجیت دووال مشاور امنیت ملی هند

آجیت دووال، مشاور امنیت ملی هند گفته است که در نشست تاجیکستان در بارۀ حقوق زنان و تشکیل حکومت همه شمول در افغانستان هم گفت‌وگو خواهد شد.

پس از حاکمیت دوبارۀ طالبان بر افغانستان، تاجیکستان به گونۀ جدی بر ایجاد حکومت فراگیر در افغانستان تاکید کرده است، اما طالبان حکومت‌شان را همه شمول می‌دانند.

شماری از کشور‌های آسیای مرکزی بخاطر آنچه گسترش تروریسم از افغانستان خوانده اند، نیز ابراز نگرانی کرده اند.

هرچند طالبان گفته اند که نمی‌گذارند از خاک افغانستان تهدیدی متوجه کشور‌های دیگر شود، شاخۀ ولایت خراسان گروه دولت اسلامی معروف به داعش مدعی شده است که از قلمرو افغانستان حملات راکتی را بر ازبکستان و تاجیکستان انجام داده است.

ازبکستان این حملات را رد اما تاجیکستان تایید کرده است.

در هفتۀ جاری، هیئت وزارت دفاع حکومت طالبان در دیدار با فرمانده گارد سرحدی ازبکستان اطمینان داد که از خاک افغانستان هیچ اقدامی بر ضد همسایگانه‌اش نخواهد شد، اما شماری از منتقدان در مورد توانایی طالبان برای جلوگیری از اقدامات احتمالی شورشیان از خاک افغانستان علیه همسایه گانش شک و تردید دارند.

XS
SM
MD
LG