لینک‌های قابل دسترسی

خبر تازه
شنبه ۲ ميزان ۱۴۰۱ کابل ۰۸:۵۶

روند اخراج پناهجویان افغان از تاجکستان ادامه یافته است


تصویر آرشیف: شماری از پناهجویان افغان در تاجیکستان

حکومت تاجیکستان اخیراً روند اخراج مهاجران افغان را ، آغاز کرده است.

مهاجران افغان در تاجیکستان می‌گویند، با آن‌که کمیشنری عالی سازمان ملل متحد برای شان کارت مهاجرت داده، اما حکومت تاجکستان آنان را اخراج می کند.

یکی از پناهجویان افغان در تاجیکستان که نمی خواهد نامش در گزارش ذکر شود می گوید که از ترس بازداشت شده و اخراج اجباری شب هنگام از خانه بیرون می شود. او می گوید که نیمهٔ شب در کوچه‌های دوشنبه، پایتخت تاجیکستان به بازار می‌رود تا برای خانه مواد خوراکه و دیگر مواد لازم بخرد.

این مهاجر افغان به رادیو آزادی گفت یک و نیم سال می‌شود که بنابر مشکلات امنیتی به تاجیکستان پناه برده است، اما اکنون در این کشور هم با ترس و ابهام زندگی می‌کند.

"من از مجبوری به اینجا آمده ام، برای فرزندم خطر بود، برای من خطر بود، به شمول من همه افغان‌ها با چنین مشکلاتی مواجه اند، از ترس دیپورت شدن به بیرون رفته نمی‌توانیم، از سازمان مهاجرت می‌خواهم تا برای ما کاری انجام دهد، اکنون ما اینجا با مشکلات جدی روبه‌رو هستیم."

بیشترین تعداد افغانهای مهاجر در کمپ وحدت در نزدیکی شهر دوشنبه تاجیکستان زنده گی می کنند
بیشترین تعداد افغانهای مهاجر در کمپ وحدت در نزدیکی شهر دوشنبه تاجیکستان زنده گی می کنند

افغان‌های ساکن در تاجیکستان می‌گویند، با آن‌که کارت‌های مهاجرت مربوط به کمیشنری عالی مهاجرت سازمان ملل متحد (UNHCR) را دارند، در حکومت تاجیکستان ثبت هستند و کارت‌ گریزه را که برای آن‎ها حق اقامت در تاجیکستان را می‌دهد دارند، اما باز هم حکومت تاجیکستان مهاجران افغان را از خانه‌هایشان بیرون کرده و به افغانستان می‌فرستد.

آنان گفته اند که برای گرفتن کار گریزه ۱۰۰۰ الی ۳۰۰۰ دالر داده‌اند.

یک مهاجر دیگر افغان که نمی‌خواهد نامش نیز در گزارش ذکر شود به رادیو آزادی گفت:

"با آن‌که همه مهاجران کارت مهاجرت سازمان ملل متحد و تاجیکستان را دارند، هیچ امکان ندارد که این‌جا کسی غیرقانونی بیاید، همه مهاجران قانونی اند، اما حال هرکس را می‌گیرند، یکی دوست من را که گرفته بودند و برایش گفته بودند، که اکنون روز استقلا ما است، پس از آن همه را از تاجیکستان اخراج می‌کنیم، یک ماه می‌شود که این روند آغاز شده است، طی ۳ یا ۴ روز گذشته ۵۰ تا ۶۰ تن را به افغانستان برگشت می‌دهند، شب گذشته هم ۵ خانواده را فرستادند."

پناهجویان افغان در تاجیکستان: کارت مهاجرت ملل متحد و اسناد تاجیکستان نیز داریم٬ اما ما را اخراج می کنند

این جوان به نام رحیم که ۶ روز پیش با برادرش از سوی حکومت تاجیکستان در آن کشور بازداشت و به افغانستان برگشت داده شده، می‌گوید که دیگر اعضای خانواده‌شان در تاجیکستان باقی مانده و او با برادرش در افغانستان است.

او افزود، برایش اندکی وقت هم داده نشد که با خانواده‌اش تماس بگیرد و در مورد دست‌گیری‌اش به آن‌ها اطلاع دهد.

"ما را از یک موتر پایین کردند و سوار موتر دیگر کردند، کارمندان امنیت هم با ما بود، ما را به سرحد آوردند، برایش گفتیم که گناه ما چه است؟ هیچ چیزی نگفتند، هرقدر که برایشان گفتم موبایل را بدهید تا به خانواده اطلاع بدهم، اسناد داریم شما بی‌دلیل ما را دیپورت می‌کنید، اما حرف ما را نشینیدند و ما را مستقیم به سرحد آوردند."

محمد ظاهر اغبر
محمد ظاهر اغبر

وزارت امور مهاجرین و عودت‌کنندگان حکومت طالبان در مورد اخراج مهاجرن افغان از تاجیکستان به رادیو آزادی چیزی نگفت، اما محمد ظاهر اغبر سفیر حکومت جمهوری پیشین افغانستان در تاجیکستان به رادیو آزادی گفت، دلیل برگشت دادن شماری از مهاجران افغانستان، اتخاذ تدابیر شدید امنیتی برای روز استقلال تاجیکستان است.

آقای اغبر گفت که گفت‌وگوها را به هدف حل این مشکل با دولت تاجیکستان و سازمان‌های بین المللی مهاجرت آغاز کرده است.

"دوستانی که اخراج شده اند، من با همۀ آنها در تماس هستم، خانواده‌های آنها را ملاقات کردم و تمام مدارک آنها را از نزدیک دیدم. لازم است دوباره مدارک آنها بررسی شود. من با آن‌های که در افغانستان هستند یا خانواده آنها اینجا هستند و با جامعۀ جهانی و نهادهای پناهندگان دولت تاجیکستان در تماس هستم، امیدوارم این ارزیابی به خوبی انجام شود و سپس همه موارد را با مردم به اشتراک می‌گذاریم."

حکومت تاجیکستان پیش از این گفته بود، افغان‌هایی را از خاک‌اش اخراج کرده، اسناد قانونی نداشتند.

اما در مورد تعداد آن‌ها جزئیات ارایه نکرده‌ است.

با وجود اینکه سفیر افغانستان در تاجیکستان دلیل اخراج افغان‌ها را نگرانی های امنیتی حکومت تاجیکستان عنوان می کند، اما مهاجران افغان مدعی هستند که پس از کاهش بودجۀ پرداختی سازمان‌های بین المللی مهاجرت به حکومت تاجکستان، این کشور پناهجویان افغان را اخراج می‌کند.

اما سازمان‌های بین المللی مهاجرت در این مورد چیزی نگفته‌اند.

کمیشنری عالی مهاجرت سازمان ملل متحد در ۲۵ آگست در مورد اخراج مهاجران افغان از سوی تاجیکستان ابراز نگرانی کرده و هشدار داده است که اخراج مردم خلاف میل‌شان عمل غیرقانونی است که زندگی این افراد را با خطر مواجه خواهد کرد.

تلاش کردیم از سازمان مهاجرت ملل متحد در تاجیکستان در مورد تعداد افغان‌های اخراج شده از این کشور و دلیل آن بپرسیم، اما این سازمان به تماس‌های ما پاسخ نداد.

XS
SM
MD
LG