گزارش شده است که پس از حاکمیت دوباره طالبان بر افغانستان در پانزدهم آگست ۲۰۲۱، محمد شریفوف مشهور به مهدی ارسلان، از سوی طالبان به عنوان فرمانده پنج ولسوالی مرزی افغانستان که در سرحد با تاجیکستان موقعیت دارند، گماشته شده بود.
طالبان این موضوع را تایید نکرده اند.
شریفوف به عنوان یکی از فرماندهان گروه مسلح انصارالله دانسته می شود، گروهی که فعالیتش در تاجیکستان ممنوع است.
محمد شریفوف از سال ۲۰۱۵ به این سو به گمان داشتن عضویت در برخی از سازمان های تروریستی تحت پیگرد حکومت تاجیکستان است.
نازنین یونیسووا، خواهر شریفوف به روز سه شنبه به بخش تاجیکستان رادیو اروپای آزاد/رادیو آزادی گفت که از سرنوشت برادرش خبری نیست.
«یک و نیم سال است که تلاش می کنیم تا بدانیم که برادرم زنده است، مرده یا دستگیر شده. به هر جا مراجعه کردیم، در مورد زنده، مرده یا زندانی بودنش معلومات گرفته نتوانستیم.»
یک عضو گروه انصارالله که بخاطر حساسیت موضوع خواسته است نامش افشا نشود، نیز به بخش تاجیکستان رادیو اروپای آزاد/رادیو آزادی گفته است که شریفوف ۹ ماه پیش در جریان سفر به کابل ناپدید شد.
به گفته او، آن ها گروهی از قاچاقبران مواد مخدر را دستگیر کردند و قاچاقبران اعتراف کردند که محمد شریفوف را گرفته بودند، اما در مورد زنده یا مرده بودنش معلومات ندادند.
یک منبع در مرکز محافظان سرحدی منطقه ختلان تاجیکستان و منبع دیگر در منطقه خودمختار کوهستانی بدخشان که نخواسته اند هویت شان افشا شود، نیز در صحبت با سرویس تاجیکستان رادیو آزادی از ناپدید شدن این عضو گروه انصارالله خبر داده اند.
این منابع گفته اند، از زمانی که در مورد مهدی ارسلان در رسانه ها به طور گسترده تبصره شد و مقامات تاجیکستان گزینشش در امور مرزی را جدی گرفتند، احتمالاً طالبان او را مخفی کرده و گزارش ها در مورد ناپدید شدنش را دروغ خوانده باشند.
محمد شریفوف ۳۰ ساله باشنده ولسوالی نورآباد تاجیکستان است.
مقامات تاجیکستان بارها بخاطر آنچه حضور جنگجویان تاجیکستانی در مرز با افغانستان خوانده شده، ابراز نگرانی کرده اند.
منابع به بخش تاجیکستان رادیو آزادی گفته اند که طالبان ظاهراً به هدف کاهش تنش ها میان کابل و دوشنبه، جنگجویان انصارالله را از مرز به مکان دیگر منتقل کرده اند.
مقامات تاجیکستان پیش از این از حضور ۲۰۰ تا ۳۰۰ جنگجوی انصارالله در افغانستان خبر داده و گفته بودند که بیشتر آن ها شهروندان تاجیکستان استند.
حکومت طالبان به گونه رسمی موجودیت گروه انصارالله در افغانستان را تایید نکرده است.
طالبان همچنان حضور بسیاری از گروههای مسلح خارجی در افغانستان به ویژه در صفوف خود شان را نیز رد کرده اند.
امرالدین تبروف فرمانده نیروهای مخالف تاجیکستان گروه انصارالله را زمانی ایجاد کرد که توافقنامه صلح میان دولت آن کشور و مخالفان مسلح در سال۱۹۹۷ را نپذیرفت و به افغانستان نقل مکان کرد.
خبر درگذشت او ۸ سال پیش در رسانه ها منتشر شد.
