تاجیکستان امروز بیست و نهمین سالروز استقلال خود، پس از فروپاشی اتحاد شوروی را جشن گرفت.
مراسم به دلیل شیوع ویروس کرونا خیلی مختصر برگزار شد.
همه ساله در نهم سپتمبر همه کشورهای واقع در آسیای مرکزی استقلال خود را تجلیل می‌کنند.
اما مقام‌های تاجیک هفته گذشته اعلام کردند که به خاطر نگرانی‌های صحی، این مراسم مختصر و بدون تجمع مردم برگزار می‌شود.
به اساس آمار رسمی شمار مبتلایان به بیماری کوید-۱۹ در تاجیکستان تا دیروز به بیش از ۸ هزار و ۸۰۰ نفر رسیده بود.
شمار کسانی که در نتیجۀ این بیماری جان داده اند، ۷۰ نفر گزارش شده است.
اما به اساس تحقیقی که بخش تاجیکی رادیو آزادی انجام داده، شمار قربانیان به مراتب بیشتر از این است.
در میان قربانیان کارمندان صحی، از جمله داکترانی شامل اند که بیماران کوید-۱۹ را درمان می‌کردند.
شمار مجموعی مبتلایان به این بیماری در سراسر جهان، به ۲۸ میلیون نفر نزدیک شده است.