افغانستان می‌گوید، قصد دارد با تاجیکستان توافقنامه همکاری استراتیژیک را امضاء کند.
وزارت خارجه این کشور امروز (۱۸ سپتمبر) در این مورد خبر داد، اما زمان و مکان امضای این سند را مشخص نکرد.
اعلامیۀ وزارت خارجه افغانستان ساعاتی پس از دیدار محمد حنیف اتمر سرپرست وزارت خارجه افغانستان با سراج‌الدین مهرالدین وزیر خارجه تاجیکستان در روز نخست سفرش به دوشنبه نشر شد.
تاجیکستان در حال حاضر با چهار کشور چین، قزاقستان، روسیه و ازبیکستان توافقنامه‌های همکاری استراتیژیک را دارد.
آقای اتمر دیروز در یک سفر دو روزه رسمی به شهر دوشنبه مرکز تاجیکستان رسید.
او در این سفرش همچنان با رئیس جمهور، صدراعظم و منشی عمومی شورای امنیت ملی تاجیکستان ملاقات کرده که در آن روی امنیت سرحدات و جلوگیری از قاچاق مواد مخدر صحبت شده است.