تاجیکستان به بیش از هزار مهاجر آواره از بدخشان پناه داد

مقام‌های ولایت گورنو بدخشان تاجیکستان می‌گویند که به بیش از هزار مهاجر افغان که در اثر جنگ‌های اخیر از بدخشان افغانستان آواره شده‌اند، پناه داده‌اند.

آژانس خبررسانی رویترز گزارش می‌دهد که اکثریت این مهاجران زنان، افراد مسن و کودکان اند.

اعلامیه دیروز (۷ جولای) مقام‌های گورنو بدخشان گفت که برای تهیه کرددن کمک غذایی و تسهیلات طبی به این مهاجران با ملل متحد و بنیاد آغا خان تماس گرفته اند.

این افراد غیرنظامی درحالی به تاجیکستان پناه برده اند که تقریبا دو هفته پیش حدود ۶۰۰ سرباز افغان در اثر فشار جنگ از بندرگاه شیرخان به تاجیکستان عبور کردند.

بخش تاجیکی رادیو آزادی از قول یک منبع امنیتی این کشور گزارش داد که برخی از این سربازان توسط طیاره‌ها دوباره به کابل انتقال داده شدند و حدود ۳۰۰ نفر دیگر آن‌ها در روزهای آینده انتقال داده خواهند شد.