سرپرست وزیران تحصیلات عالی و معارف حکومت طالبان برای اشتراک در دومین مجمع بین‌المللی وزیران معارف به روسیه رفته‌اند.
رادیو تلویزیون ملی تحت کنترل حکومت طالبان امروز شنبه گزارش داد که ندا محمد ندیم، سرپرست وزارت تحصیلات عالی و حبیب‌الله آغا، سرپرست وزارت معارف حکومت طالبان به روسیه سفر کرده‌اند.
در ادامه آمده است که حبیب‌الله آغا در مورد وضعیت معارف، «دست‌آوردها»، چالش‌ها و فرصت‌ها در بخش معارف کشور سخنرانی خواهد کرد.
گزارش شده است که این نشست در شهر کازان برگزار می‌شود.
نزدیک به ۳ سال است که حکومت طالبان اجازه نمی‌دهد دختران بالاتر از صنف ششم به مکتب بروند.
طالبان از ماه دسامبر سال ۲۰۲۲ به این سو نیز دروازه‌های پوهنتون‌ها را به روی دانشجویان دختر بسته‌اند.