سرمنشی ملل متحد امیدوار است که موضوعات مرزی قرقیزستان و تاجیکستان به گونۀ مسالمت‌آمیز حل شود
انتونیو گوترش، سرمنشی ملل متحد، ابراز امیدواری کرده است که تمامی مشکلات سرحدی میان قرقیزستان و تاجیکستان از راه مسالمت‌آمیز حل شود.
گوترش امروز سه‌شنبه، ۱۳ ماه سرطان، هنگام گفت‌وگو با سدیر جعفروف، رئیس‌جمهور قرقیزستان، در شهر چولپان‌آتا از قرقیزستان خواست که نماد صلح باشد.
گوترش افزود، باور دارد که مشکلات مرزی از راه دیپلماتیک، مسالمت‌آمیز و مذاکرات، طوری که با ازبکستان حل شد، با تاجیکستان نیز حل خواهد شد.
مشکلات تعیین علامت‌گذاری سرحدات میان قرقیزستان و تاجیکستان از چندین دهه وجود داشته، اما این نزاع بعد از چندین برخورد سرحدی در سال‌های اخیر جدی‌تر شد.
در یکی از این برخوردها در بهار سال ۲۰۲۱، ۳۶ نفر از قرقیزستان به شمول کودک کشته و ۱۵۴ تن دیگر زخمی شدند.
مقامات تاجیکستان گفتند که در این برخورد ۱۹ نفر از تاجیکستان کشته و ۸۷ تن دیگر زخمی شدند.