رهبران پاکستان و تاجیکستان در دیدار امروز چهارشنبه، ۱۳ ماه سرطان، علاوه بر روابط دوجانبه، در مورد افغانستان هم گفتگو کردند و یک افغانستان صلح‌آمیز و مرفه را برای امنیت منطقه مهم خواندند.
شهباز شریف، صدراعظم پاکستان و امام علی رحمان، رئیس‌جمهور تاجیکستان در شهر دوشنبه دیدار و توافقنامه همکاری‌های استراتژیک را امضا کردند.
وزارت خارجه پاکستان در بیانیه‌ای اعلام کرد که دو طرف ایجاد یک حکومت فراگیر را برای ثبات افغانستان مهم خواندند.
براساس اعلامیه، آقای شریف گفت که در حال حاضر کشورش از طریق بندر کراچی از طریق افغانستان به تاجیکستان اموال تجارتی می‌فرستد.
اما او تأکید کرده که می‌خواهد از طریق جاده و خط ریل هم با تاجیکستان وصل شود.
پاکستان و تاجیکستان پیش از این گفته بودند که با تهدیدات امنیتی از خاک افغانستان رو به‌رو هستند.
اما حکومت طالبان به‌گونهٔ مکرر این نگرانی‌ها را بی‌اساس خوانده و اطمینان داده که از خاک افغانستان هیچ تهدیدی متوجه کشورهای دیگر نیست.