ستره محکمه تاجیکستان شماری از سیاسیون این کشور را به اتهام تلاش برای کودتا، به زندان محکوم کرد.
براساس گزارش بخش تاجیکستان رادیو آزادی، حکم صادر شده از سوی ستره محکمه این کشور، شامل حبس های طولانی مدت و مصادرۀ دارایی ها می‌شود که نگرانی ها در مورد سرکوب مخالفین سیاسی در تاجیکستان را تشدید می بخشد.
براساس حکم این محکمه، همراه خان ظریفی، وزیر خارجه پیشین به ۲۷ سال زندان، سید جعفرعثمان زاده، وکیل سابق پارلمان به ۲۷ سال زندان و اکبرشاه اسکندروف، رئیس سابق شورای عالی تاجیکستان به ۱۸ سال زندان، محکوم شدند.
جریان محاکمه این افراد در جون ۲۰۲۴ پس از آن آغاز شد که این سیاستمداران به اتهام تلاش برای راه اندازی کودتا، تقلب و فساد و نفرت پراگنی میان مردم متهم شدند.
اما در جریان محاکمه، متهمان بر بی گناهی خود تاکید کرده و اتهامات علیه شان را انگیزه سیاسی خواندند.