مارکو روبیو، وزیر خارجهٔ ایالات متحده و اسحاق دار، معاون صدراعظم و وزیر خارجهٔ پاکستان بر اهمیت تداوم همکاری‌ها میان دو کشور در زمینهٔ مبارزه با تروریزم تأکید کردند.
در بیانیهٔ وزارت خارجهٔ ایالات متحده به نقل از تامی بروس، سخنگوی این وزارت آمده است که در مکالمهٔ تلیفونی روز دوشنبه، آقای روبیو از پاکستان به‌خاطر بازداشت و انتقال محمد شریف‌الله، عضو شاخهٔ ولایت خراسان گروه دولت اسلامی معروف به داعش، به ایالات متحده تشکر کرد.
دونالد ترمپ، رئیس‌جمهور ایالات متحده در نخستین سخنرانی دورهٔ دوم ریاست‌جمهوری‌اش در کانگرس در اوایل ماه مارچ از بازداشت شریف‌الله خبر داد.
آقای ترمپ شریف‌الله را تروریست و عامل حملهٔ انتحاری ۲۶ اگست ۲۰۲۱ در نزدیکی میدان هوایی کابل خواند و گفت که او را به‌تازگی دستگیر کرده‌اند.
در آن حمله، ۱۳ سرباز امریکایی و ۱۷۰ شهروند افغانستان کشته شدند. داعش مسئولیت این رویداد را پذیرفته بود.