کمیتۀ دولتی امنیت ملی تاجیکستان می گوید که برای اولین بار یک گروه قاچاقچی مواد مخدر با استفاده از طیاره های بی سرنشین در مرز با افغانستان از بین برده شد.
تلویزیون دولتی تاجیکستان در گزارشی روز شنبه (۱ قوس ، ۲۲ نوامبر ) گفت که ۷ قاچاقبر پس از عبور از مرز مورد حمله قرار گرفتند.
در گزارش آمده است که این حمله در (۲۰ نوامبر) در محلۀ همدانی در نزدیک مرز افغانستان صورت گرفته و اجساد دو تن از افراد یافت شده است.
در گزارش ، این افراد باشندگان ولسوالی درقد ولایت تخار معرفی شده اند.
مقام های کمیتۀ دولتی امنیت ملی تاجیکستان گفته اند که ۱۱۶ بستۀ مواد مخدر نیز کشف و ضبط شده است.
تاجیکستان با افغانستان بیش از یکهزار کیلومتر مرز مشترک دارد.
به گزارش بخش تاجیکستان رادیو آزادی ، مخالفان حکومت این کشور ادعا می کنند که برخی منصبداران تاجیک در انتقال مواد مخدر از افغانستان دست دارند ؛ اما مقام ها این ادعا را رد کرده اند.